Укх материала тIа оаха дувцаргда Абубакарахи Iаьлехи даьхкача хозача гIулакхех (Даьла раьза хилва царна шиннена а). Пайхамаро йоах: (Даьлагара салам-моаршал хилда цунна) «Ший дегIаца хоза гIулакх долаш вола къонах, дийнахьа марха а кхоабаш, бийсанна Далла Iибадат а

деш волаш вола саг даржага кхоачаргва. Пайхамар (Даьлагара салам-моаршал хилда цунна) Дала хьамел кхеллача адамал хозафгIа гIулакх долаш хиннав, Элчан Асхьабаш а тIехьа цун дегIаца долча хозача гIулакхех кхыметтел тамаш йора (Даьла раьза хилва царна). Абубакаро (Даьла раьза хилва цунна) оалар Пайхамарага: (Даьлагара салам-моаршал хилда цунна) «Iарбашта а Iарбий боацача наха юкъе а дукха го баьхаб аз, хьох доаллаш дола хоза гIулакх долаш саг бIарга ма вайнавац сона. Хьона из гIулакх Iомадаьр малув Я РассулаллахIи оалар цо. Абубакара шийга из хаттар дича Пайхамаро (Даьлагара салам-моаршал хилда цунна) жоп делар: «Сона гIулакх Iомадаьр са Даьла а ва цо Iомадаьр хоза а да».
Ший Асхьабашта хьехам бора цо, шоай дегIамашца хоза гIулакх хилийта. Пайхамаро (Даьлагара салам-моаршал хилда цунна) хьийха дола хоза гIулакх шоашца хиннача шин Асхьабах дувцаргда вай тахан. Уж ба Абубакари Iаьлеи (Даьла раьза хилва царна). Уж шаккхе а (Даьла раьза хилва царна) Пайхамар волча (Даьлагара салам-моаршал хилда цунна) бахар. Пайхамара наIарга дIакхаьчача, Абубакаро аьлар йоах Iаьлийга, хьо хьалха вала, аьнна. Iаьло юха аьлар йоах, хьо вала веза хьалха, аьнна. Iаьло аьлар йоах: Хьол хьалха со мишта варгва Пайхамаро (Даьлагара салам-моаршал хилда цунна) цIи яьккха къонах хьо хилча, Абубакар са бIаргий лир да аьнна хьо хоаставаь хилча хьол хьалха мишта варгва со, аьнна. Абубакаро аьлар йоах тIаккха (Даьла раьза хилва царна): Со мишта варгва хьол хьалха. Пайхамаро ма аьннадарий (Даьлагара салам-моаршал хилда цунна) кхалнаха юкъе дикагIа йола кхалсаг, дикагIа волаш волча маIача сага йигай яхаш ший йоI Фатимат Iа йигача хана, аьнна хилча. Iаьлас аьлар йоах тIаккха, со хьалха мишта варгва, къонахчоа, малх хьал а кхийттабац шоана, малх чу а бизабац шоана Абубакарал дикагIа волча къонахчоа тIагIолла мара вай Пайхамаро, аьнна хилча. ТIаккха Абубакара аьлар йоах (Даьла раьза хилва цунна): Со санна волча къонахчоа хьалха мишта варгва, Пайхамаро ма аьннадий (Даьлагара салам-моаршал хилда цунна): Ялсмален чухь хIара къонахчун воша хургва шоана са воша Iаьла, — аьнна хилча. Iаьлас аьлар йоах (Даьла раьза хилва цунна): Со хьалха мишта варгва къонахчул, Пайхамаро ма аьннадарий (Даьлагара салам-моаршал хилда цунна): Са умматах мел волча сага иман тараза цхьан оаркхинга тIа а диллача, Абубакара иман дезагIа хург ма дар аьнна, аьлча. Абубакара аьлар йоах тIаккха (Даьла раьза хилва цунна): Со хьалха мишта варгва къонахчул Пайхамаро ма аьннадарий (Даьлагара салам-моаршал хилда цунна) Iилмай шахьар я шоана со, цу шахьарий ниI-Iаьла ва шоана, аьнна. Пайхамаро хьох ишта аьнна хилча со мишта варгвар хьол хьалха. ТIаккха Iаьлас аьлар йоах (Даьла раьза хилва цунна): Со мишта варгвар къонахчул хьалха Пайхамаро ма аьннадарий, Со Даьлагара а доацаш кхычахьара гIо деха дезаш хилча Абубакарагара гIо дехарг ма дар аз, аьнна. Абубакаро аьлар йоах тIаккха (Даьла раьза хилва цунна): Со хьалха мишта варгва, къонахчул Пайхамаро (Даьлагара салам-моаршал хилда цунна) ма аьннадарий: кхоана доагIаргдолча къемата дийнахьа машаре цхьа къонах хьавоала а вергва, из къонах Ялсмале дIачу а вохийтаргва. ТIаккха адамаша аргда йоах: малагIа Пайхамар ва из, — аьнна. ТIаккха аргда йоах цу нахага, Пайхамар вац шоана из, Iаьла ва шоана из, аьнна. Къемата дийнахьа хьо иштта Ялсмале гIоргхилар Элчано белгал ма даьккхадий, тIаккха со мишта воалар хьол хьалха. Iаьлас аьлар йоах тIаккха (Даьла раьза хилва цунна): Со хьалха мишта варгва къонахчул, цхьаккха барт-хоаттам боацаш Ялсмале дIачугIоргвар хьо ва аьнна Пайхамаро аьнна хилча (Даьлагара салам-моаршал хилда цунна). Абубакаро аргда йоах тIаккха: къонахчул со хьалха мишта варгва им диллача сагага мара вела а лац, мунафикъ волчоа мара эгIаз а водац хьо аьнна Элчано (Даьлагара салам-моаршал хилда цунна) иштта хьо хьоахаваь хилча. Iаьло аьлар йоах тIаккха (Даьла раьза хилва цунна): Со хьалха мишта варгва къонахчоа, деррига Iаламаш кхелла волча Дала КъорIанчухь хьо хьоахаваь, хьо раьза вергва оаха Ялсмаленца, аьнна хилча. Из мича хана дар аьлча, шийга мел дола рузкъа а дахьаш из Пайхамар волча (Даьлагара салам-моаршал хилда цунна) хьавеча, Пайхамаро аьлар цунга (Даьлагара салам-моаршал хилда цунна): Я Абубакар, хьай дезалашта юхе фу дитад Iа, аьнна. Ер сай рузкъа а дахьаш Даьла Элча волча хьавенав со, сай дезалашта юхе Даьлеи Даьла Элчеи витав аз, цо из аьлча, цу ханна Дала Жабраьил малейк дайтад ер аят дахьаш. Абубакарийга тIехьагIо хьо хьараьза вергволга дIаала, Ялсмален аьла вергволга дIаала. Селлара хьо Дала Ше хьоахаваь хилча, со мишта варгвар хьол хьалха. ТIаккха Дала Ше Пайхамар волча Жабраьил малейк дайтар йоах (Даьлагара салам-моаршал хилда цунна). Дала салам кхайкаду хьога яхаш а долаш, хьалгIатта йоах хьога Дала. Хьа наIарга а баьхка хоза гIулакх лаьца хьа ши новкъост ва хьона, цу шинне лаьца долча хозача гIулакха сигала мел дола малейк царга хьожаш да хьона. ТIаккха араваьлар йоах Пайхамар (Даьлагара салам-моаршал хилда цунна). Цхьа кулг Абубакарий фоартан тIа IотIадиллар цо, шоллагIа дола кулг Iаьлий фоартан тIа IотIадиллар. Иштта дIачугIоргда вай, аьлар йоах Пайхамаро (Даьлагара салам-моаршал хилда цунна). Укх тайпара шо шиъ уллув а волаш Ялсмаленчухь а дIачугIоргда-кх вай, аьнна. Цар дIадихьа хоза гIулакхаш, цар дIабихьа хоза никъ дIахобахьа низ кхоачалба вай. Укх безача мархий бетта а ер дIабаьлча а хоза гIулакхаш леладе а, нийссадар дIадахьа а Дала низ лолба вайна.

БIархой Муслим

«Сердало»