Тахан наха юкъе латтача хьалага хьежача гуш да вайна «хьехархо» яха ц1и мел хала яккхийта еза

. Моллаг1ча сагага вай хаьттача цу сага дег чу вижа, цун вахара никъ хьийха цхьа хьехархо хул дегара ца воалаш мел дукха ха яхарах. З1амига волча хана кхетадац из ц1и яьккхийта мел хала да, бакъда вахара халонаш ла ше волавелча, дег чу вижа хьехархо кхы а дукхаг1а везалу. Дукха х1ама дайна, вахара хало 1айша, мел ховчун зем баь даьлга кхетаду саго цу хьехархочо шийна хьехар. Иштта ший мел хиннача дешархой дег чу соцаш, замано халонаш хьалхашка мел увттаеча хана цун хьехарах пайда эцаш дешархошта а езаш, дешархой а безаш болх беш хьайоаг1а Алхастерча ишколе берий сакхетам лакхбара директора г1онча йола Сампиева Мухьмада Малика. Цхьавола хьехархо хул ший дезал беций а ший дешархой нанна мо дукха безаш, царех геттара ч1оаг1а дог лазаш. Иштта беза Маликайна а ший мел хинна дешархой. Маликас берашца болх бу 24 шу да.
- Берашта везаргвац шоаш ца деза саг. Берашта везавалийта тахан атта дац. Цхьадолча берашта геттара дукха х1ама хов вай. Бакъда цу берий оамалаш а йовзаш, х1аранена боаг1ача тайпара зем беш, 1а царца болх беча хана ч1оаг1а сакъердаме да царца болх беш, - аьлар Маликас тха къамаьл долалуча хана.
1993 шера ткъеста шу даьнна мара хиннаяц Малика вахара халонаш ла езаш, нийсадар доацар къостаде дезаш декхар хьалхашка эттача хана. Цу шера маьре а хинна цхьан бетта цигача яхачул т1ехьаг1а ц1а а ена ишколе исбахьлен кулгалхо йолаш болх бе йода из. «Пандарч» яха кружок лелаеш, иллешта мукъам а дешаш а ше яздеш дукха иллеш да цун. Царех массаьхкане ц1и яькхха безам ба са: «Г1алг1айче», «Берашта», «Илли даха са дог», «Нана», «Кавказ» иштта кхыдараш а. «Ше беш бола болх чам болаш, массане зувргболаш бу цо», оал цох юртахоша а шийца болх беш болча хьехархоша а.
Балха ена дукха ха ялалехь берий сакхетам лакхбара директора г1ончий болх караберзабу цо. «Пандар лакха харах массайола мероприяти хоза кийчъе в1ашт1ехьадоал са тахан а. Цу хана сона ма езза аппаратура кхыдола х1ама а дацар сога. Кхыметтел лерт1а берашца болх бе кабинет йоацаш ара берашца къахьега дезаш хулар. Укхаза болх бе йолаелча денз цхьа х1ама ер са де мича деза аьнна хийттадац сона, сайна хозаг1а хургда-кх ер иштта аьнна хийтта х1ама сай алапи 1одилла а де хьежай со»- аьлар Маликас ше къаьмаьл деча хана.
Укх шера цхьайттлаг1ча класса кулгалхо хиннай Малика. Цо кийчъяь «Т1ехьара гургал» яха мероприяти шийна б1аргацаяйча дувцарах из мел хозаяр оалалургдоацаш иззал хоза яр. Х1ара хьехархочоа юрта ц1ераг1а грамота кийчъяь, массайолча хьехархочун дог хьоастаргдолаш совг1ата елар цо. Дукхаг1а мел дола ц1айш дездеча, е берашта даьй хоза г1улакхаш кердадоахача мероприятешка телевидени а корреспонденташ а хул цу ишколе. Юртара боккхаг1а бола къоаной, дукха дезал кхебаь ноаной гулбаь мовлат дешийташ, совг1аташ телаш массехк кхетаче д1аяхьа в1ашт1ехьа даьлар цун укх шера. Гулбеннараш ч1оаг1а баркал оалаш д1аяхьа хов цун моллаг1а в1ашаг1кхетар.
- Тахан кердача ишколе сайна ма хетта болх бергба аз. Ч1оаг1а хоза ишкол ма йий тха юрта х1анз х1алъяьр. Дукха халонаш увттар укх къаьнача ишколе сона хьалхашка. Массайолча хьехархочун ц1ераг1а баркал ала ловргдар сона цигача къа мел хьийгача сага.
- Малика, хьат1адоаг1аш керда дешара шу да, цу кердач шерца хьай белхага хьежжа малаг1а ловца боккхаргбар 1а вай дешархошта?
- Цхьан къоарга уйла еча саго аьннад: «Хьайна хьехача сага 1а сий ца дой, цо хьехаш долча 1илмах пайда бала йиш яц, аьнна». Эггара хьалха дешархоша шоай хьехархой сий де деза укх дуне чу цар хьийхача 1илмах пайда баргболаш. Яхь, эхь, эдел яха кхо х1ама вайх д1акъаьстача-м г1алг1ай да ала а йиш мичай вай. Укх дуне чу х1аране новкъостий хинна улув латталда вайна уж.
Х1аьта т1ехьара дешаш Маликай илле т1ара ала безам ба са. Беркате, даькъала хийла вай т1ехье!
«Маьрша дахка шо,
маьрша г1о шо
Са хьамсара деза бераш.
Ираз хилда шун,
аьттув хилба шун,
Укх дунен чухь даькъала
хилда шо!»
ОЗДОЙ Малика
Сердало