Главная Стартовой Избранное Карта Сообщение
Вы гость вход | регистрация 28 / 03 / 2024 Время Московское: 6788 Человек (а) в сети
 

Ший къамах дог лазар

Дукха ба г1алг1ай къаман сий дола, яхь йола къонахий. Ший къаман хьал мадарра довзаш а, из хьал тоадеш массайолча оаг1орахь зем боаккхаш, къахьегаш, нийсдар, бакъдар тохкаш хьабаьхка а ба. Цар массарий ц1ераш яха а ца езаш уж вайна бовзаш хила беза. Царех ва х1ара ше 1оловза ког къаман бала кхетабеш а,

къаман истори довзара, тохкара къахьегаш хьавоаг1а Дакиев Ахьмада Мохьмад.
Дакиев Мохьмад тахан вай мехкал арахьа вахаш ва, Питере, бакъда цо г1алг1ай мотт лебеш хьахезачоа хеталургда- кх, в1алла ше йоаккхача хана укх мехкар араваьнна ха яьккха вий хьог1 ер, аьнна, селлара ц1ена, к1оарга, хоза цо из мотт лебеш. Х1аьта, укх деношка Мохьмад ший мехка ц1авена волаш хьоашалг1а вена хилар Магасе, Ахриев Чхьаг1а ц1ерах йолча Паччахьалкхен 1илман-тохкама институте. Цу института кулгалхочо Тангиев Бахьаудина а, иштта института болхлоша а безаме т1аийцар хьаьший. Ч1оаг1а самукъадоаккхаш, пайда эцаш а д1адехьар из в1ашаг1кхетар. Дакиев Мохьмада вахара-кхоллама никъ ца бовзаш а бар цу чу цхьабараш, бакъда, боккхача безамца, х1ара цун дош лорадеш, вахара керда оаг1онаш йовзара сутар болаш бар института болхлой.
Дакиев Мохьмад ваьв 1934 шера 5 июне.
Ший ло1аме а волаш, немцашта духьала т1ом бе т1ем т1а вахарех ва Мохьмада да, Дакиев Гадой Ахьмад. Цу т1ем т1а ч1оаг1а чов хилар бахьан долаш ший мехка ц1авера из. Шаккъе ког а, аьтта кулг а даьккхадар цун, моастаг1чо духьале еш кхийттача герзо. Ший йиса ха хала унахо а волаш яьккхар Ахьмада.
Мохьмад а волаш пхи дезалхо хиннав Ахьмада. Мохьмад воккхаг1а хиннав, з1амаг1а йиъ йи1иг хиннай. Вайнах Сибарег1а 1обахийтача хана массаболча наха санна моцал а къизал а лайнай Мохьмада дезал. Т1ехьаг1о военный пенси доладенна хиннад Мохьмада даьна, х1аьта лайнача халонех к1алхар-м боалабеннабац. Фашисташта духьала баьча т1ем т1а хиннача човнех лазар к1оарга а денна кхалхар Мохьмада да. Т1ехьаг1о даь-воша а, т1аккха з1амаг1а йола йиша а кхалхар.
Ший вахара-кхоллама никъ бувцаш Дакиев Мохьмада аьлар: « Эзареи ийсб1аь шовзткъеи барайттлаг1ча шера деша эттар со Ленинградский институт театра, музыки и кино, оалача. Кховзткъеи шоллаг1ча шера из дешар со чакхдаьккха ваьлча Шолжа-г1ала т1а балха 1охьожавир со. Цу хана Культура Министр Татаев Ахьмада Ваха вар. Цо аьлар сога, хье укхаз болх бе лаьрх1а вале нохчий меттел мара йист хургвац хьо, аьнна, бакъда сона нохчий мотт во ховра, аз цунга из д1ааьлар. Аз яхаш бола болх сона бала безам хиланзар цун, цо яха болх аз хьат1аэцанзар.
Т1аккха х1ирашкахь вахар со. Ч1оаг1а раьза а хинна со д1аэца безам болаш къамаьл дир сога цар министра г1онча хинначо. Телевидени а документальни студи а сона болх хургболаш бар.
? Аз балха хьаэцаргва хьо цхьан хаттара 1а сона жоп лой, аьлар сога цо. Хьай къаман х1ана везац хьо, шун къаман истори мича хиннав 1а дийша институт яьккха саг? Хац – аьнна жоп делар аз цунга, кхы со цига юха а ваханзар. Цул т1ехьаг1а ши шу даьлча Москве юха вахар со. Культура Министра г1онча Стриганов вар цу хана. Цо тайп-тайпарча моттигашка болх бе раьза хургвий хьожаш, хаттараш тийлар сона, юххера а Ленфильме хьожавир со цо. Кховзкъе диълаг1ча шера денз кхозткъе итталг1 шу даллаца Ленфильме болх бир аз».
Иштта дукха безаме къамаьл дир Мохьмада института болхлошца. Цхьацца хаттараш телаш 1илман болхлой а бар.
Хоза хийттар сона дукхаг1а болча хьежархошта дезаденна дола «Белое солнце пустыни» яха кино доаккхаш режиссерах ца1 Дакиев Мохьмад хилар.
Иштта дукха кинош да, аьлар Мохьмада ший дакъа лаьца, Совети 1аьдало наха д1агойта бокъа ца елар бахьан долаш уж х1анза а арадаьннадац.
Цу в1ашаг1кхетаре мел хиннараш Мохьмада цига хьаварах баркал оалаш бар. Иштта ший арг1ах из даькъал а вувцаш, Мохьмад санна бола вай къаман къонгаш хам беш, сий деш, из санна болча наьха лерх1ам бе вайна ха дезалга белгал а доаккхаш, ший оаг1орахь хоза ловца боаккхаш йистхилар образовани Министра г1онча вола Дударов Мажит.
Моллаг1а долча дикача х1аман юкъе г1алг1ачун ц1и, тайпан ц1и латташ хилча ч1оаг1а дог г1оздоал. Тахан, ше воккха ва ца оалаш, т1ехьенна бала болаш, къаман бала болаш, ше боаха г1а къаман духь яхаш волча Дакиев Мохьмада дег т1ара баркал ала ловра. Х1анза санна визза хьай къаман во1 а волаш, дуккхача шерашка вахалва хьо!
ГАЬГЕ-НАЬКЪАН Фатима

Вы можете разместить эту новость у себя в социальной сети

Доброго времени суток, уважаемый посетитель!

В комментариях категорически запрещено:

  1. Оскорблять чужое достоинство.
  2. Сеять и проявлять межнациональную или межрелигиозную рознь.
  3. Употреблять ненормативную лексику, мат.

За нарушение правил следует предупреждение или бан (зависит от нарушения). При публикации комментариев старайтесь, по мере возможности, придерживаться правил вайнахского этикета. Старайтесь не оскорблять других пользователей. Всегда помните о том, что каждый человек несет ответственность за свои слова перед Аллахом и законом России!

© 2007-2009
| Реклама | Ссылки | Партнеры