Кастта ши шу доал «Фейсбук» яхача интернета ресурса чу са цIи йола. Нийсса ши шу хьалха, «Одноклассникашка», «Инстаграмме» е кхыйолча интернет-боангашка саго вийхача, бIаргашка чу а хьежаш, бегвоаккхаргвар аз из саг. Фейсбук-м дош довзар мара, фу я а хацар сона.

Бакъда, цкъа вIалла дага а доацаш ше даьккхача , «Теш!» яхаш, цIи йолча кинога а хьеже, сайна хетар хьаала, аьнна, дехар дир сога хIанз Санкт-Петербурге яхача Хазбиева Хьавас. Хьоашал-наькъан Iаьлий поэзи дукхаезарца довзаш дар тхо.
Иштта чуваьлар со «Фейсбуке». Кино шозза а, кхозза а хьежар, хетар дIааьлар. ТIаккха аравала лаьрхIар аз. Кино со хьежача юкъа дукха «доттагIий» хилар са «Фейсбука» чухьа - кхалла а, маIа а. Кхалла бараш дуненахьа хоза бар, тIехьагIа мара хайнзар сона уж Голливудера, Болливудера туркий сериалашкара актрисай сурташ долга. Керда хьатIавенача сона теркам чIоагIа бир, са сурт хоза да аьлар кхо бIаь саго. Цу сурта тIа вагIар се волга а ховш, шек чIоагIа вувлар со, бакъда, дега-м хоза хетар бакъдоацар а.
Араваьлар со юххера «Фейсбука» чура. Цукерберга со чуваьнналга а, араваьнналга а хайнзар, сона бIаргадайначох, из ший цIен да вацар. Аравоаллача хана, хаьдда дIавоавалехьа, юха чувола бокъо лу ши кIира дIадаллалца.
Кхойтта ди доаллаше, пIелг тоIабир аз, чувита, аьнна. Иштта лаьцар со «Фейсбуко». Со морггаш эзараш, эзараш ба укхаза.

ПАЙДА
ХIанз кIордабаьб сона ер «цхарал» бакъда, цхьан хIамо лаьца лоаттаву.
Дукха гаргара нах ба са укх чу, каст-каста телефон а, карташ а доаду аз, цудухьа царца бувзам лоаттабе атта да.
Дунен тIа мел хинна керда хIама а хов хьона, массехк минот ялале.
Дына гIулакхаш Iомаде йиш я, дукха пайдане хьехамаш хул укх чу. Пайдане доацараш а хул, бакъда, хьа уж дIадаха йиш я, кхы хозаргдоацаш. Хьайна кIордаваьр дIаваккха йиш я, «тролль» дIакъайлаяккха йиш я.
МоллагIча мехкара сагаца доттагIал тесса йиш я, из хье волча хьоашалгIа веха, массехк дийнахьа, кIира хьай болх, ахча, ха йоаеш цунга ГIалгIай мохк дIахьокха. ТIехьагIа цо хье ший мехка, форда йисте, кIайча гIумар тIа салаIа вехаргва моттаргда хьона. Вехаргва, даьра! Кийча хилалахь, укх сахьате тохаргъя хьога телефон, лаьрххIа сиглен кема дайта а мег, Iовдала корта!

ЗЕ
Эггара доккхагIа дола зе да – цо йоаю ха. Ха йоаяр-м кхыча метте а нийслу, бакъда, укх чу йоаю ха ши кепиг мах боацача хIамаех йоаю. Массала, цхьаккха бала хьай боацача къовсама юкъе а вахе, хийла бIарчча ди доаду… яздеш… яздеш. Цкъаза во мел дар хьога хьаоал, цкъаза Iа дIаоал.
ТIаккха дIадолалу: «Хье маIа вале, телефон хьатоха, вIашагIкхетаргда вай». Фу де воал хьо вIашагIкхийттача? Хьа бат йохае воал.
Воай вахаре Iовдалча нахах лоралу вай, хIаьта Фейсбуке Iовдала нах кхы а дукхагIа болга кхетадац.
Укх чу волаш, зIамига-доккха тIемаш дукха бIаргадайра сона. ДоттагIий хинна вIашагIкхийтта нах къовсамаш а даьхе, даьна-нанна а бехкаш, къаст. Къаьстта дукха а чIоагIа довнаш доах ха яхача мехкараша.
Сага эшаш боацача поэташа бала бахь, хIара дийнахьа керда стихотворени гойташ. Уж дIабаха безаш хул. «Забанить» оал цу хIамах.
Иштта дукха, е пайда а, е зе а доаца хIамаш да фейсбуке.
Ара-м хала воал укх чура саг. ХIаране ший бахьан да, хIара – со санна «ца ховш» чувена ва.
Иштта я-кх ер «ФЕЙСБУК».
Р. Цуров
Сердало