Вай къамах а болаш 1аьдала лакхача балхашка къа а хьийга, г1алг1ай эздела боарамашца наха а мегаш, лерх1аме хиннача хьакимий ц1ераш йиссай сакхетаме. Тайпан ц1и яккха а ца езаш бовзаш хинначарех ба:

Махье Ахьмад (Газдиев), Ахьмада 1ийса (Абадиев), Зоврбика Мурад (Боров). Х1анз дийна вола Арсмака во1 Арсамаки (Мальсагов), Мажита Сергей (Сараждини) (Беков). Царца ларх1а воаг1а Дзортов Сайдара
Аьдал-Гири. Уж новкъостий хиларах тарра царца хоза г1улакх, эздел леладу цун цо хадданза. В1аши гаргало лелалеш, лерх1ам беш, чакхбоал уж шоаш дийна мел ба.

Вайна ховш да советий 1аьдал долча хана цу 1аьдала а мегаш къаманна а мегаш хьакимал де мел хала дар. Цхьабакъда уж вай хьоахабаь къонахий эздий бар, шоашка доал де хьаденна рузкъа лораде маькарло йолаш говза бар. Царех вар Сайдара Аьдал-Гири (Дзортов) Нохч-Г1алг1ай АССР меттаоттаяьча шерашка бехктокхамеча балхашка хиннав из. Цох да ер йоазув. Автора карахдаьннад цун вахара а къахьегама а керттера наькъаш белгалде.
Бе-беча замашка дуккхача наха хьалхашка ийтта хаттар да, сенна вах укх дунен чу, яхар. Цхьаболчар шоай вахар хетаду рузкъа 1оадара, вокхар - зуламаш дара, х1аьта кхоалаг1чар - наьха дегашка шоай лар йитара. Цу наьха дегашка вижарех ца1 ва Дзортнаькъан Сайдара Аьдал-Гири. Из ваьв эзара ийс б1аь ткъаь ворх1лаг1ча шера вурийттлаг1ча марте Бурок1ала, хьаьнала къахьегаш ваьхача Дзортнаькъан Муртаза Сайдара дезале. Аьдал-Гири ваь цхьа к1ира даьлча, цун нана Дидигнаькъан Райхьант кхелхай. Из хьалкхеваьв воакхаг1волча, цу хана ший дезал а болаш веший Къамбулата хиннача сесаго 1оахаргнаькъан Исмейлий Забрата.
Аьдал-Гире бера ха атта хилац, бакъда дукха эргаш дац цун берал цун ханарчарца дистача. Веший сесаго нана санна к1аьда, хозача г1улакхаца йолаш, болча из аьттонах пайда эцаш хьалкхеву из. Цу эздийча кхалсага сийдеш чакхвоал Аьдал-Гири ше дийна мелва. «Са веший сесаго нана дагайохийтаяц сона. Нана санна лаьттай из» оалаш хиннад цо.
Кхойтта шу даьнна к1аьнк деша вода эзара ийс б1аь шовзткълаг1ча шера Шолжа-Г1алий т1а Мехкдаьтта институте чу хиннача рабфаке. Цу рабфаке дийша воалашехь а Сайдара дезал а, деррига г1алг1ай къам санна, мехках баьхаб. Сибарег1а 1окхаьчача хьалхарча шин шера Кустанайски областе Станционни поселке, «Коммунар» яхача колхозе, тракторни бригада учетчик хул Аьдал-Гири. Цхьабакъда ши шу совг1а ха яьлча цар дезал Фрунзе баха д1аболх эшаш дола наькъа каьхаташ даьхе, 1946 шера. Город Фрунзе, цу ханначухь Фрунзе ц1ераг1а хиннача «Сельмашзаводе» склада счетоводалла вода Аьдил-Гири.
Ала деза цу заводе къахьегаш волаш сиха даржа лакхлу из. Счетовод волаш д1аволавенна кузнечни цехе наладчик а, техник-планировщик а, т1ехьаг1а мастер а, технолог а, цу цеха кулгалхочун г1онча волаш а балхаш леладу Аьдал-Гире. Эзара ийс б1аь шовзткъе шийттлаг1ча шера Алероев Юнуса йо1 Хатимат (Зора) йоалаю Аьдал-Гире. Х1аьта диъ шу кхы даьлча г. Фрунзе хинна машиностроительни техникум йистейоакх цо.
Цхьабакъда, ца говш Кавказе ц1абахка бокъо яьлча шоай мехкацара безам ч1оаг1а хиларах, эзара ийс б1аь шовзткъе вурийттлаг1ча шера, эггара хьалха боаг1арашца шоай мехка ц1абоаг1а Сайдара дезал. Цу хана Аьдал-Гири шиъ бер долаш хиннав. Шолжа-Г1алий т1а «Красный молот» яхача заводе кузнечни цехе мастералла вода из. 1аьдало ший дезалца ваха общежите цхьа ц1а лу цунна. Эзара ийс б1аь шовзткъе ткъестлаг1ча шера Аьдал-Гири хьожаву мехкдаьтта химически промышленноста къахьегамхой профсоюза Обкома отдела кулгалде. Эзара ийс б1аь кховзткълаг1ча шера Москве ялх бетта йола партийни болхлой кийчбеш йола курсаш чакх а яьхе ц1авоаг1а из.
Цига цунца деша баьг1аб Пхьилекъонгий Саварбик, Албошнаькъан Ахьмад, Дахкильгнаькъан Шукри. Кастлуш КПСС - а Ленински райкома секретаралла хьожаву Аьдал-Гири. Х1аьта эзара ийс б1аь кховзткъе ялхлаг1ча шерагара эзара ийс б1аь кховзткъе иттлаг1ча шерага кхаччалца Аьдал-Гири къахьегаш хилар Нохч-Г1алг1ай АССР - а моттигерча промышленноста Министра дарже.
Цул т1ехьаг1а эзара ийс б1аь кховзткъе дийттлаг1ча шерага кхаччалца Наьсарерча Трикотажни фабрика кулгалде хьожаву Аьдал-Гири. Вайцига духхьашха йилла производство из хиларах, маькарло йола говза кулгалхой тоъаш а боацаш министра дарже волчара цига балха вохийт из лакхерча 1аьдала хьакимаша.
Эзара ийс б1аь кховзткъе дийттлаг1ча шера Шолжа-Г1алий т1а балха юхавода Аьдал-Гири. Нохч-Г1алг1ай АССР - а Паччахьалкхен плана воккхаг1вола экономист хилар из ах шера. Цул т1ехьаг1а диъ шера Нохч-Г1алг1ай АССР-а коммунальни боахама Министерства водоконала урхаллене кулгалхо волаш къахьег Аьдал-Гири. Эзара ийс б1аь кховзткъе барайттлагйча шерагара денз пенсе вахалца денз, ийс шера Нохч-Г1алг1ай Министрий Совете доагор доаккхача урхаллен кулгалхо хилар из.
Эзара ийс б1аь кхоалапг1ча кховзткъеи шера денз дуккхача шерашка Ленински района а Нохч-Г1алг1ай Лакхехьарча Совета а депутат а хиннав Аьдал-Гири. Ший къахьегама наькъ т1а даьха доккхий толамаш бахьан долаш тайп-тайпара совг1аташ тийнад Дзортов Сайдара Аьдал-Гирена «Къахьегама ц1еча байракха» орден, «Дика къахьегар бахьан долаш» яха В.И. Ленина б1аь шу дизара ден хетаяь мейдалг. Ше хьаваьнна моттиг, ший дезал биц ца болийташ къахьийгачарех а хиннав Сайдара Аьдал-Гири. Балхара мукъа мел йола ха Бурок1ала йоаккхар цо аьле белгалдора тайпан наха а юртхоша а. Нагахьа мара ца хулача балхара мукъа волча ханачухь Шолжа т1а а Наьсар т1а а чкъьарий лувца ухар, лоам, даьй г1алаш йолча а кхувлар дезал, яхаш дувц из дагавоаг1араша.
Эзара ийс б1аь дезткъе барайттлагйча шера кхойттлаг1ча июне вайцара д1акъаьстар сийдола къонах, ший Даьхен виза во1 Дзортнаькъан Сайдара Аьдал-Гири. Карарча хана Аьдал-Гире ши йо1 Маккие Мадинаи маьре яха шоай дезалаш а болаш яхаш я. Х1аьта Аьдал-Гири ц1ен-нана Хатимат Бурок1ала из ваьхача коа ях.

Дала гешт долда цох, вийрза моттиг даькъала хийла. Сона хетаргахь, из санна болча къонахий ц1ераш яхаргья дунен чу дуккхача замалахьа.

Сердало