Хьайна дала денначун Далла хоастам белахьа,
Хьайца дацеи, нанацеи к1аьда-мерза хилалахь,
Хье раьза цахилар цанна ма гойталахь,
Хьай вежарашца а яхь лелаелахь,
Хьай вежарашта эшаш йола хьай х1ама кхо ма елахь,
Хьай вежарашкара даьнна х1ама нахала ма даккхалахь.

Мел мо из вале а сагаца хьаг1 ма лелаелахь,
Хьай ц1аг1а даьнна дов пхьег1а т1а ма кхахьалахь,
Г1ийла мискачарца сонта ма хилалахь,
Хьаьнал къахьийга доацар рузкъа ма гулделахь,
Наьха рузкъа лочкъадеш ма хилалахь,
Хьай бехк а болаш гаргалол ма хоадаелахь.

Лоалахочунца ч1оаг1а сабаре хилалахь,
Айха лелоргдоаца керда заг1а т1а ма эцалахь,
Хьай фусаме кхаьча саг хьаьша вий т1аэцалахь,
Хьаьша кхача дикаг1абар лелахь,
Хьаьша мотт,г1ейба к1аьдаг1а бар биллалахь,
Хьаьшо даь дехар кхоачашде хьажалахь,
Хьаьша д1аваххалца чухьа дов ма даккхалахь,
Хьаьша д1аводаш, из накъа ваккхалахь.

Лоалахочун таьзета даггара хьовзалахь,
Хьай бера т1аг1олла нахаца дов ма дахалахь,
Хьай моастаг1чунца ямарт ма хилалахь,
Хьайла боаккхаг1чарца г1улакхаца хилалахь,
Хьайла кегирчар лерам белахь,
Воаккхаг1вар йист хулаш юкъе ма лелхалахь,
Воаккхаг1вар чувеча, цунна хьалг1атталахь,
Воаккхаг1авар 1о халцца, 1о ма халахь,
Хьо 1о хоавой а на1аргахьа халахь,
Воаккхаг1чо къамаьл деш,ч1оаг1а ладувг1алахь,
Цун пурамаца мара йист ма хилалахь,
Воаккхаг1чунца д1аводаш аьрда оаг1ора отталахь,
Цунна новкъа хула х1ама сиха д1аяккхалахь.

Хьай дов нахага ма кхувдаделахь,
Наьха дов хьайна т1а ма эцалахь,
Йоалаю сесаг дикача ц1ен т1ара йоалаелахь,
Саг йоалайича аха шера боаккхийчарег1 хьулалелахь,
1айха нускалца къамаьл деш
даьнеи наьнеи ма хазийталахь,
Нускалаца 1охайна даьнеи, наьнеи
гаргарча нахае ма гойталахь,
Хьайна метала сесагага къамаьл ма дайталахь,
Сесага багара гоаламаш д1а ма яхалахь.

Хьа нанас йоахе, лоа 1аьржа да,
Хьай сесагага из лоа к1ай да ма алийталахь,
Техе а,1етте а, вилхе а ц1ен наьнаг1а сесаг е хьажалахь,
Сесаг ма йиталахь, цунна т1а сесаг ма йоалаелахь,
Ши сесаг а йоалайий даькъаза ма валахь,
Хьай лоамий мича ба сесага ма хайталахь,
Хьай сесаго из лоамий лохаргболга халахь,
Из цунна хоййа, хье фусам да воацилга халахь.

Ц1аг1а эшаш дар хьо ховш хилалахь,
Наьха истий сецо ма г1ерталахь,
Хьай сесаг нахага ма сецаяйталахь,
Хьай сесагаца кад-1аг къовса ма отталахь,
Хьай ноанахой, хьай устц1ей лоарх1аш хилалахь.

Хье 1еш вола фусам айхьза ма яккхалахь,
Фусаме барт лоаттош Да хиле латталахь,
Къонгаш дукха ба аьле,
Царег1а доаккхалдеш ма хилалахь,
Даьша лелаяь гаргалол хеда ма елахь.

Хьайна цхьа дикадаьчоа, кхо дика де хьажалахь,
Хьайна цхьа во даьчоа, цхьа во а дийа 1елахь,
Хьай воне е таьзета олламий ма хилалахь,
Хьай б1аргаха хий доалаш цхьаннена ма гойталахь,
Наьха воне е таьзета велаш г1адвахе ма хилалахь.

Эг1аз ваха хье волаш къамаьл ма делахь,
1айха ду къамаьл дувнаца ч1оаг1 ма делахь,
1айха дергдоацар, дергда ма алалахь,
Къор1анца дув биъе, доттаг1а ма лацалахь,
Хьайга ца хаьттача хаттара жоп ма лелахь,
Хьайга д1абохьалургбоаца мухь т1а ма эцалахь.

Мел г1ийла вале а сага курал ма елахь,
Мел хьалдолаш вале а, сага хьеста ма лелахь,
Хьайга ца кхейкача кхетаче ма ахалахь,
Кхейкача хье воде, хьай г1анд лораделахь,
Хье г1оттавергволча г1анда т1а ма халахь.

Тиша барзкъа дийхе, хьо хьоашалг1а ма г1олахь,
Ц1ена барзкъа дийхе хьо лаьтта аха ма г1олахь,
Наьха къейленаш ха ма г1ерталахь,
Хьай къайленаш наха ма ювцалахь,
Доаца х1ама наха т1акхоллаш ма хилалахь,
Мел боаккха цабезаш бале а, сага мотт ма тохалахь,
Хье мел ц1ена вале а, къор1аха дув ца баъа г1орталахь,
Нахаца модз санна мерза ма хилалахь,
Е сим санна къахьа ма хилалахь.

1овдала йола камаьршое, сонта майрале ма лелаелахь,
Хьайга тахан дулургдар кхоаненга ма теталахь,
Хьайга хьал долча хана мискачанна г1о де хьажалахь,
1айха д1алургдоаца совг1ат нахагара ма дехалахь,
Хьайна дича ца мегар, наха ма делахь.

Дей хина боахамаш дувца ма отталахь,
Дай чурташ мичахьа да нахага ма хетталахь,
Дай маьхка дар мара ираз доацилга халахь,
Дей г1улакх довзалга д1акхача хьажалахь,
Г1улакх доацар из саг воацилга халахь,
Дай маьхка эшачоа д1аотташ хилалахь,
Дезачунга хье кхоачаргвоацилга халахь,
Хьайга долчун 1а хам ца боййа.

Д1аяьздаьр М. АУШЕВ.
90 -шу даьннача Аушанаькъан
Г1аьбартечун Махьмад хьаоалаш

Сердало