ДIадахача оршот дийнахьа Шолжа района юкъерча библиотеке вена хилар Карелера хьаша - кулгалхой барта председатель, йоазанхо, А. И. Купринаи С. В. Михалковаи премей лауреат Костюнин Виктора Александр. Александра дийцар библиотека болхлошка ше ГIaлгIaй мехка вара бахьан а ший кхолламах лаьца а

. ТIехьарча шерашка Россе Федераце Правительства амар дирах Къулбаседа Кавказа къамаех лаьца очеркаш, дувцараш яздеш ва из. Ший болх дIахьо гIерт из вай къаман белгалбаьннача лерхIамеча нахага гIолла, ГIaлгIайчен культурага, Iаламан хозаленга, къонача начIалашка гIолла. Виктора Александра хьалха боккхийча нахаца, къаман сакъердамеча бахархошца, кхувш йоагIача тIехьенца вIашагIкхетараш да.
ХIаьта ГIалгIайчен Александра зерат дира цхьаькха а да бахьан - Мужечера юкъера ишкола кулгалхочо Бисайнаькъан Тамарас а кулгалхоша а из хьоашала вийха хилар. Вай мехка март бетта 30-ча дийнахьа кхаьчав из, тIаккха бераш чухийца денош дIадаларца апрель бетта 4-ча дийнахьа ишколе а венав. Кхо шу да ишкола дешархой Костюнина "Купель" яхача Дерригача дунен тIара литературни конкурсе дакъа лоацаш бола. Царна юкъе ба: 11-ча класса дешархой - Хакинаькъан Беслана Iумар, ИсмаIалнаькъан Хьамзата Хьава, 8-ча класса дешархо Оздой Мухьмада Мовсар, 7-ча класса дешархой - Балайнаькъан Iисай Зейнап, Гандарнаькъан Руслана Аьсет, Катинаькъан Iалихана Хьасан, Бохтарнаькъан Iусман-Хьажий Замира, Овшнаькъан Беслана Саид, Далинаькъан Мухьмада Аьсет, 2-ча класса дешархо Бесайнаькъан Хьасана Iашат. ЧIоагIа раьза бар дешархой шоаш дакъа лаьцача конкурса автор, шоай лаьрхIa a лаьрхIа, вена хиларах.
ХIанз Костюнин Александр вай мехка истори тахка а цун бахархой бовза а дагахьа хIара районе зерат де дагахьа ва. Аьттув хилба цун лерхIамца вай безача мехках язде!

ВЕШКАРНАЬКЪАН Фатима
"Сердало"