Вай мехка эггара къаьнаг1ча иишколах ца1 я Алхастераяр. Иишколан цхьа корпус хьалъяьй 1932 шера

. Цу корпусе кабинеташ з1амига а к1езига а я. Юххьанцара классашкара дешархоша деш цу чу. Шоллаг1а йола корпус къезига цул йоккхаг1а я. Из хьалъяьй 1956 шера Цу корпусе 5-11 классашкара дешархоша деш. Ишкола з1амига хиларах шин смена болх бе безаш хул хьехархой.
Дукхача хана денз ше кхо ца еш болх беш хьайоаг1а цу иишкола директор йола Фаргиева Султана Радимхан. Юртарча наха а дешархоша а лоарх1аш, ший балхах б1у ца къожабеш, 1урденна сарралца ший балха т1ераялац ала йиш йолаш, къахьег цо иишколе. Хьехархочун болх цун цу иишколе д1аболалу 1981 шера юххьанцара классашта хьехаш. Цул т1ехьаг1а юкъерча классашта эрсий мотти литературеи хьийхад цо. Белхароев Абукара Макшарип директор волча хана берий сакхетам лакхбара цун г1онча йолаш болх бу. 1986 шера денз тахан а иишкола директор йолаш, к1аьд а луш къахьег цо. Вай мехка дикаг1а болча хьехархошта, телаш дола совг1аташ а, ц1ераш а я цунна: «Учитель-методист», «Отличник народного образования», «Заслуженный учитель РИ».
Оахош къамаьл деча хана цун балхах лаьца массехк хаттар делар аз цунга.
- Ишколе болх бе атта доацилга массанена а ховш ма дий. Цхьацца декхар шийна хьалхашка отта а деш из т1ате11а кхоачашдеш болх бе безаш моттиг я яр. Малаг1а декхараш да 1а хьайна хьалхашка увттадераш?
- Ишкола директор – из хьехархой а дешархой а кулгалхо ва. Цхьан сага, из кулгалхо вале а, цхьаккха х1ама делургдац. Хьехархошца цхьана кхоачашду оаха моллаг1а дола декхар.
Ишкол - из берий шоллаг1а дола ц1а да. Тхо цу берашта уж укхаза долча хана шоллаг1а дола дай - ноаной да. Чоаг1а бехктокхаме болх ба из. Лакхе мел аьннар ларде а дуллаш увттаду оаха тхоашта хьалхашка балха декхараш. Эггара хьалхара а керттера декхар да - дешархой вахарцара а дешарцара а кхетам совбаккхар, дешар – из цар керттера декхар долга хьалхадаккхар. Д1ахо мел дола х1ама цу т1ара 1одоаг1а – г1алг1ай эхь-эзделаца, иманца уж кхебар а, шоаш даьча х1аман шоаш жоп дала дезилга массе а хана царна хьалхадахар а. Вай къаман цхьан саго зулам дича цох хинна хатар мехка мел волча сагага кхоач. Х1аьта цхьан саго толамаш доахе мехка сий хьалдоакх. Уж «з1амига» толамаш д1адолу моттиг я ишкола. Дешархошта доаг1ача тайпара хьеха моттиг еце а, укх ишколера хьехархоша дика кхетаду из г1улакх. Дукхача яхьашка коттбувлаш, шоай ишколан сий лакха лоаттадеш толамаш доах тха дешархоша. Иштта вай мехка бизза къонгаши мехкари хьалкхебара къахьегар – из керттера декхар да сона а аз кулгалдеш болча хьехархошта а хьалхашка латтар.
- Хьай хьехархой тоабах лаьца фу аргдар 1а? Шоай болх хьона ловча бесса кхоачашбе в1ашт1ехьа доалий цар?
- Тахан вай замано д1адехача тайпара тхоай болх хьабе моттиг яц тхона. Х1ара г1онча ший кабинет, хьехархошта методически кабинеташ, берашта урокаш йистеялча кружокашка цхьацца х1ама 1омаде, е дешара говзал лакхъе моттигаш эш. Шин смена болх беш бале а, ишкола з1амига яле а хьехархой шоай болх ховш ба са. Цун тешал ду тха дешархоша доахача толамаша. Керда ишкола хьалъеш-м латт тхона. Ч1оаг1а эшаш я из укх юрта. Дукха ха я из еш латта-м йисте ца йоала мара. Кастлуш йистеяьккха еза яхаш болх беш боахк цига нах. Из бахьан доккха баркал ала лов сона юртахой ц1ераг1а вай мехка даьна а цигача къа мел хьийгача сага а.
- Дукха дешархой б1аргабайнаб хьона, дукхача нахага д1акхаьчад 1а дешарах даьнна беркат. Х1анз хьай хиннача а болча а дешархошта малаг1а ловца боакхаргбар 1а, т1айоаг1ача хана царна накъадаргдолаш малаг1а дешаш ардар 1а?
Эггара хьалха саг иман долаш хила веза. Г1алг1ай эхь-эздел, яхь, сий фуд ховш хила веза. Уж вай къаман дикаг1а йола оамалаш я. Ший мотт, къам дезаш хила веза. Ший къам, мотт ца лоарх1ача сага ховргдац кхыдолча къамашца барта хила а. Из вай заманчухь ч1оаг1а эшаш оамал я. Дог ц1ена долаш волча сага дега сердал гонахьа мел волча сагага д1акхоач. Цу моча сагах наха зе-зулам далац. Шийна а наха накъавоалаш, мохк а къам а дезарца х1ара дийнахьа толамаш доахаш хул цу тайпара саг. Иштта хила веза вай х1ара мехкахо. Т1аккха хоза хургба вай мохк. Дикача х1аман т1ехьа Дала аьттув боаккхалба вай массане а, во х1ама хьаде дага а ма дохалда цхьанена а.
ОЗДОЙ Малика
ГIалгIай мехка къаман юкъара газет "Сердало".